يا تمساح الاربعين يا مكدك نايبك سنين

بسم الله الرحمن الرحيم
يا تمساح الاربعين يا مكدك نايبك سنين
نادر ود بدر الفي ام ضبان ساسك متين

بادي بي الحي المعين
بتكلم يا سامعين
فوق تمساح الاربعين
الحاز ولاية الصادقين
وحاز أمانة الراشدين
اتحكر غلب اللعين
ما جلق ركب الهجين
ما شد حمارو السمين
ما بسأل حيرانو وين
الفي امضبان يا سامعين
عندي البحر للواردين
***********

بتكلم بجيب قصيد
فوق القاصع موهو وليد
دقوا لو مرق للعيد
عينو تشوف شلك البعيد
ومن السافل للصعيد
يدو تتم كف المريد
فرحت بيك ضربك نجيض
وهدم قيوفو وزاد بعيد
**************

بتكلم فوقك بنم
يا ركاب امات لجم
للحيران فرسك بلم
للطلاب واهل العلم
والماسكين قلم الحكم
للجلاس والحضرة تم
يتجزأ على كم قسم
خيل الغيب جابن عكم
هو اب رسوة وعاجتو كم
***********

عرج فوق صاحب المزية
ابوي تاي الله الفي البنية
ما شد بكوس الهدية
وما تبع الدنيا الدنية
وما برقد كيف الرزية
وما اتحكرلو فوق صينية
وما شبع سلات وشية
في المجنون ما بدور هدية
رأس سكر وشاهي الوقية
الحسكنيت ذكروها ليا
………………..
حارسو النبا من ود رية
حسن الركزة القوية
يا اللميت النفيدية
خليتم راس في طاقية
الفي سرحان يا اب قرنا ليا
وقول لي نوم حملك عليا
************

بتكلم أنا بي نهاية
وفوق ارباب الولاية
ما شد بكوس الهدايا
وما بصرف من السرايا
حارس الرحمة الغير نهاية
في الضحى دخل البناية
ما خوجل لبس العباية
كم كسى القاعدين عرايا
كم درج لي كم ولايا
الفي ام ضبان عاجبني غاية
هو البحر وردوا الظمايا
***************

يا اخواني كيف البصارة
قالوا لي شن البصارة
وشكرت النجباء الخيارا
صايمين الضي والليل سهارا
في الحضرة اجتمعوا الندارا
بعد الصيف جابوا الخضارا
طبقوا الكي جلبوا السكارا
انا عندي شيوخ القدارا
واحدين ككر واحدين نظارة
الفي امضبان اهل التجارة
اصلو الأدب حسب الاشارة
*************

يا البادراب اهل الصلاح
النفيدي ليكم صاح
يا ركابين علي المراح
وسماعين صيحة الصياح
وقشاشين دمع النواح
قولوا لي وزرك مباح
وبعد الوقار نكسيك وشاح
****************

صلى الحي المعين
على شفاع المذنبين
ترضي اصحابو الراشدين
وبشراكم يا مسلمين

نقلا عن ود الخليفه ، بتصرف