الفوق جيلو وافر كيلو طيب القوم في قنابيلو

بسم الله الرحمن الرحيم

الفوق جيلو وافر كيلو طيب القوم في قنابيلو

حي يا جليلو عبدك قيلو

يقيم ليلو ويعبر كيلو

*****

ثن تسجيلو بي شافع الويلو

يوم امشيلو حملي يشيلوا

******

اصحابوا البرروا للدين نصروا

هانوا الكفرو هتكوا الفقروا

*********

الجيلي الجاب ناسا أعجاب

من الشراب صلحوا الالباب

*******

من سيد الغار وجد الاسرار

كم غرس اشجار رمت الثمار

*****

من شيخ بولاد وجد الامداد

كم زال فساد من البلاد

*******

الفوق جيلو عرضن خيلو

الشاد حيلو ليمو حليلو

******

تلقى هائم تقول صائم

بالليل قائم وحارقو السم

*******

تلقاهو يوح تشوفو تزح

عندو التصحيح وقدرو رجيح

*****

جيتك عطشان من القيزان

قول لي ضمان ترجع رويان

*******

واقف بالباب داير الشراب

قول لي اشرب من غير حساب

******

داير اتكلم لكني ابلم

قول لي جزم اتمك تم

*******

نظم القصيد ليك عبيد

حسن البليد ينما ويزيد

*******

صلى وسلم على الختم

يوم الندم بي اخواني أسلم

تاليف مولانا الفقيه حسن الشيخ محمد الفكي خالد (ود الزاكي)

في مدح الاستاذ الخليفة الطيب الخليفة الشيخ النظيف أحمد بدر