السواح .. السواح القامو الليل لي الصباح .. ليمهم متين يا فتاح

بسم الله الرحمن الرحيم
السواح .. السواح القامو الليل لي الصباح .. ليمهم متين يا فتاح

بادي الأمداح بي الأنزل القرءان صاح
راجـي القبول مع الربـاح أسير بي سير الصحــاح
***
ثني وصاح بي خاتم الرسل المصباح
يوم حيرتي وسري يباح غير الرسول ما لي نجاح
***
صحبه الهمام صديق والأشهر الإسلام
عثمان تالـــياً دوام علـــي الكـــرار الكــفر ضــــام
***
باقي الأصحاب البايعو وسامو الرقاب
مولاي بهم نرجو الإجاب نسلك طريق أهل الصواب
***
شيخ الجيلان في كل بلد سوي القيمان
واحدين عباد تلوا القرآن واحدين ساموا جافوا الأوطان
***
واحدين ملوك واحدين زهاد حلوا المدروك
واحدين لابسين درعاً مشبوك يلفوا الضايقين أسرع من عوك
***
فرسان تحقيق الواظبوا وأحيوا الطريق
واحدين قاعدين لي فرج الضيق واحدين فطورهم الإبريق
***
بحور العوم الدارسين كل العلوم
ديل سافروا وجافوا النوم وباللحظات سقوا المكتوم
***
واحدين أفراد واحدين قاعدين فوق الأوراد
واحدين سروا تركوا للزاد يا سادتي عبيدكم ناد
***
واحدين همام واحدين بدلاً ما بردوا كلام
واحدين قاموا جوف الظلام يلفوا المضيق كبرقٍ قام
***
واحدين أبوات واحدين كم سددوا الخلوات
واحدين صاموا علي القرضات أهل الدنقر الخبات
***
واحدين ظاهرين واحدين مخفيين واحدين طابقين ديمة التحصين
واحدين لابسين شايلين سنين أهل الدنقر الرطين
***
مريدهم لا تكون بعيد من ردهم
عسى تنتفع بي شربهم ديل الرسول ما بردهم
***
واحدين راكبين ديمة الخيول
واحدين سايحين وسط التلول
***
واحدين كاسهم مليان يجول
أهل الدنقر المشيول
***
اسمع ما اقول يا مريدهم لا تكون ملول
ديل الحيو طرق الرسول بي حبهم تجد القبول
***
يآ الفحول إبن الشيخ ليكم يقول
بها الطيب راجي القبول بكم ويزيل عنه الكسول
***
علي الرسول صلاة وسلاماً يطول
تصباه في حرمو وتقول تأتينا بي سند الوصول

28/5/ 1972م

تحرير: كرار الطيب الشيخ