نظيف لا شك وريث الدكة ود بلاع

بسم الله الرحمن الرحيم
نظيف لا شك وريث الدكة ود بلاع

مولاي من لكة نظف عقلي من الركة
أفوز لا شك مع السائرين وراث الدكة
***********
بي ود مكة ثنيت القول به بتحكى
شفيع لا شك يوم الناس تقيف منربكة
**********
قول خلفاهو صديق وعمر الواسع جاهو
عثمان تالي السبع تلاه والكرار الدين علاهو
*********
نظيف لاشك رجزت القول عليك بتحكى
رئيس الدكة قائد القوم بهم تتكى
*********
اسمو الشيخ مكنى خليفة قنوع لله مجافي الجيفة
الذكرو رفيفة نوع في نوع في كم تصنيفة
**********
زهود في الزايلة شوف في الحلقة قدلتو الخايلة
عدَّال المايلة بترجم حربي دمعتو السايلة
********
طبلو الهرَّاس جوكي الجكة دق نحاسو
انظر لي مقاسو شروق وغروب بخلص ناسو
**********
ما بعرف الخوف فارس الدين في الكون معروفو
ترجم بي حروف جاب السليب والعين بتشوفو
********
ما بعرف الغش نيلو الفاق مو بطين الرش
عندو السوق مو سوق التش سوق السايرين بعرفو البش
*********
انظر لي شرقو وشوف نفلو يوم حوبة وبرقو
عند هجو الطائل زرقو دخل الحلقة وبين فرقو
*********
شوف حمَّر كيف خشَّ العزاز وبرم الكيف
زار التوم الخريف مو صيف ختاها فوق بحرو وطلق الهيف
*********
راكب الخيول فارس الفراس دي الحريقة الما بتنقاس
للمضيق خلاص شروق الصين وغروب دار فاس
***********
صبور وقنوع طاوي الجوف موالي الجوع
قيمانو رتوع خريف ود ريا المو صقوع
**********
ميزانو بكيل من ود ريا الباعو طويل
الوزنو تقيل الحربي أحمد نشابو بشيل
*********
عبيدكم يوم مشهور بي التوم
ود حمد منظوم في سلك القوم
**********
صلواتي عموم لي ابي ام كلثوم
تنجابا القوم في ذاك اليوم

تحرير : حسب الرسول الطيب الشيخ
نقلا عن المادح: محمد نور احمد عبد الله (ود الشيخ موسى)