عيب شبابي الما هرب والله لي خير العرب

بسم الله الرحمن الرحيم
عيب شبابي الما هرب والله لي خير العرب

الراوي بي فرحة وطرب
صلح لي حوضو الانخرب
شرب لذيذ ملأ زين كرب
نقر لي طبل العز ضرب
***************

الناس جوه يجروا كرب كرب
قالوا لو ده ايه يا أخي العرب
قال نجدتي أنا لي رب
وأنا قلت يا عطشان شرب
******************

الشربو في الحال اضطرب
قام همل الأوطان سرب
لي غرة العينين هرب
مقصودو يبرى من الجرب
********************

الليلة لاح برق الحجاز
يا أخواني خلى النوم خزاز
الأمة في فرح والتذاذ
وأنا جاني ما جاك يا الحراز
*******************

إت مرضك الجاك الخريف
وأنا جاني حب طه الشريف
أنت في أوان الصيف تليف
وأنا ما لي طب إلا ليهو أضيف
******************

عبيدك القضى في الهوى
عميره تراه اليوم نوى
أنا واخوتي المعاي سوا
قول مجلسهم تحت اللواء
*********************

أخواني سكان قوز رجب
ليهم علي حقا وجب
أدعوك دعايا ما انحجب
قول لي أبشر بي الوجب
*****************

صليت صلاة تمشي عك
في فرعها التسليم شعك
ترضيك يا طه وتسمعك
قولا تقول هذا معك
*************

صليت على خير العباد
تسليمي كل ما يوم يزاد
ينقلنا من دار الفساد
يكتبنا في العين السعاد

تأليف الشيخ محمد بدر رضي الله عنه